ДЖОРЧ ХУЭДИЗ ТХЪУФАКЪЫМ

Щӏэжокъуэ Зафер и тхылъым седжэ пэт сигу къэкӏижащ Джорч.

Ар ди къуэжэ хьэт, абы къыщымынэу Адыгэ хьэт, абы къыщымынэу хьэ сурэт ихьа зы Адыгэт а хьэр.

Джорч Адыгэбзэкӏэ нэхъ упсалъэу пхуидэтэкъым. Къыуэбэнт, ухигъэзыхьт. “Джорч увыӏэ./Джорч делэ ухъижа? /Джорч сэращ…” жыпӏэу Адыгэбзэ зэхомгъэхмэ узэпкъыритхъыным хуэдэу къэгубжьт. Адыгэбзэр зэрзэхихыу банэр щимгъэтми къыпкӏэрыкӏижт. Къуажэм хамэ къызэрдэхьэу я макъ зэрзыхиху жэти ирихужьэт. Дэ “Кӏэрыкӏ Джорч!” жытӏэуэ тхуэмгубжьмэ якӏэрыкӏтэкъым.

Джорч гъэфӏауэ, псори ирихужьэу ауэ ипэкӏэ унэгъу сыщыбгъэдэмхьэуэ щыт махуэ гуэрэм я пщӏантӏэм пэунэгъу унэ гуэрэм сыкӏуэн хуеящ. Зы баш кӏыхь къасщтэри сыздэкӏуэнум сынэсакъэ жысӏэ пэт хьэр дэнэ къихуами къакӏуэри къызжьэхэлъащ. Сэ башымкӏэ ӏусхуну согъэсыс ауэ и дзэмрэ башымрэ зэблофтыкӏ щхьэ шынэкъым. Сигъэгужьеипау си зыныбжьэгъу къыкъуэкӏри нывэ щидзым хьэр тӏэкӏу икӏуэтащ. Сэри сепхъух щэби нывэ къэсщтэри хьэм сеуащ. Хьэр пщӏори банэурэ тӏэкӏу ӏукӏри сытми сыкъелащ.

Адрей махуэр къурмэн е хьидт. Я пщӏантӏэм и унэгъу бжьэпэмкӏэ дехынути “Сэ Джорч къысхуигъэгъункъым сызэреуар.” жоуэ сегупщысри си жыритӏым нывэ тӏурытӏ ислъхьащ. Бжьэпэмкӏэ тӏэкӏу дехри мис къэкӏуакъым жысӏэу сыщытрэ пэт сеплъамэ Джорч къысбгъэдохьэ. Си зы жыпым си зы ӏэр исхуэри нывэхэр сыубыдащ сызэрнуэнум хуэдэу. Адре си ӏэр сышийри.”Джорч лӏо узыхуейр? “жысӏащ. Хьэр къызэпэмыурэ скъиуфэрэзыхьа нэужь и щхьэм ӏэ дэслъащ. Тӏанэ и кӏэр игъэкӏэрахъуэри ӏукӏижащ.

Абы щыщӏэдзауэ си ныбжьэгъушхуэ хъуащ. Къуажэм зызгъэпсэхуну сыкъэкӏуэжу сыщежьэжыну махуэм нэс къэкӏуэурэ ӏусащ ди бжэӏупэм. Еджапӏэм сыкӏуэжмэ и унэ кӏуэжт. Къуажэм сыдэкӏыу къэскӏухьыну сежьэмэ си гъусэт. Гъэщӏэгъуэныр аращи шхын хуэбдзмэ ишхьэкъым. “Джорч пшхын?” жоуэ хуэмурэ бгъэдэплъхьэмэт ептыр щишхыр.

Щӏымахуэ махуэ гуэрэм ди пхъурылъхум дей дыӏутт. Уэс телът. Зы гуэрхэм депэщэщт. Зы джэду шыр цӏыкӏу блыным дей щыст. Джорч абы епхъуэну зыщыричым сыхуилъри ӏукӏащ. Джэдури тӏэкӏу ӏусхури сыбэлэргъауэ Джорч къакӏуэри джэдум епхъуащ. Тӏанэ джэдур иудыныщӏэри къыщехуэхым и ныбэр къиуащ.

Тӏанэ Джорч сщыхуэгубжым къызэплъащ ауэ ар сыт еплъыкӏэ! Цӏыхум хуэдэу укӏытат. Тӏанэ Джорч Ӏукӏ мыде жысӏэри жыжэу ӏукӏащ. Зы мазэ хъухукӏэ Джорч жыжэ щытурэ, къызэмкӏуалӏэу дэнэ сыкӏуэми нэкӏуащ. Сепсэлӏакъым. Ауэ зы мазэ нэужьым “Джорч къакӏуэ!” жоуэ сыщеджэм жэурэ къакӏущ, си дамэм и лъэкъуитӏымкӏэ сыкъыдыриупсеящ. Сызэпимэхьащ, и щхьэр къысщихъуащ. И нэхэр къигуфӏыкӏижащ.

Джорч щыпсэум псэури нэхъ ӏэфӏт…